Eto ay karugtong ng naunang kong post na may pamagat na “unang regalo”. Minumungkahi ko na basahin nyo muna ang naunang post bago ituloy ang pagbabasa nitong post na ito.
2. Matiisin- isang babae rin ang nagturo sa akin ng pagiging matiisin, kung paano mabuhay araw araw ng may kasamang pagtitiis. Ang maghintay kasama ang kanyang pamilya sa isang napakahabang pila bago sila mabigyan ng pangangalaga, iba ay naiinis na at kung anu ano na lumalabas na masasamang salita sa kanilang bibig dahil sa tagal ng kanilang paghihintay ngunit siya ay tahimik lang na naroroon at hinihintay na sila ay mabigyan ng pansin. Ang kwento nya:
Pagkatapos ng ilang taong pagsasama,hiniwalayan niya ang kanyang asawang mahilig manakit. Mayroon siyang isang anak na lalaki na maysakit sa pag-iisip at kailangan ng lunas. May katiyagaan nya itong inaalagaan at binibigay kung ano man ang pangangailangan nito.
3. Matiyaga- isang batang lalaki naman ang nagturo sa akin nito.. sa kabila ng sila ay mahirap lang at kapos sa panggastos, siya ay matiyagang gumagawa ng paraan para magkaroon ng kanilang makakain at ipambabaon sa eskwela. Ang kanyang kwento:
Napansin ko ang batang ito na araw araw na matiyagang nagbebenta ng kalamansi sa palengke at minsan ay plastic bag, minsan ay tumpok tumpok na sibuyas para lang sila ng kanyang mga kapatid ay may mabaon sa eskwela. Minsan nakiki angkas na lamang sila sa mga pampasaherong jeep, sumasabit sa likod ng mga trak at kung walang mag-sakay sila ay maglalakad na lamang.. sa pagpasok at sa pag-uwi.
4. Mapag-bigay- isang lalaking hindi katandaan ang nagturo sa akin nito. Kahit na nakaranas ng krisis sa buhay at sakit ng kalooban, hindi pa rin niya nakalimutang tumulong sa mga nangangailangan. ang kanyang kwento:
Ng nagtatrabaho siya sa ibang bansa, Iniwan siya ng kanyang asawa at inubos ang lahat ng kanyang pera, binenta ang kotse at bahay..kaya pag-uwi niya rito ay wala siyang bahay at wala ang pera niyang pinagpaguran. Buti na lang may binigay pa sa kanyang sahod bago sya umuwi at mayroon siyang magulang na matutuluyan. Sa kabila ng nangyari sa kanya, palagi siyang nakahandang mag boluntaryo kapag may proyektong paglingap na magaganap. ” marami akong natutunan kapag narito ako, natutunan kong harapin ang sarili kong problema. Handa lagi akong pagaanin ang pasanin ng iba.” wika niya.
5. Mababang Loob/Simple- Natutunan kong maging simple katulad ng mga bata, Isang dalagita ang ang nagturo sa akin nito. Isa siyang dating prostitute, naghanap ng ibang marangal na trabaho, Iniwan niya ang kanyang kinakasamang boyfriend dahil sa pananakit. sa kabila ng mga panunukso sa kanya dahil sa kanyang nakaraan, nakukuhang pa rin niyang hindi lumaban at maging mababang loob lamang. May ibang taong naging maramot sa kanya, may iba naman na binigyan siya ng pagkakataong magbago at magsimula muli. Noong huli kong kita sa kanya sa kanilang bahay, eto lang nasabi niya ” sa buong buhay ko parang ang pakiramdam ko ay bata ulit ako.” wika niya.
6. Matatag- sa kabila ng hirap sa buhay gumagawa sila ng paraan para mabuhay. Minsan nasa kalsada sila para magbenta at kumita ng konting pera. Minsan kailangan din nilang maging ma utak para hindi maloko ng kanilang kapwa. Tinuruan nilang akong maging matatag anuman ang mangyari.
Isang binatilyo naturo sa akin, sa edad desisyete(17), siya naging ulila. Nalulong sa droga, pagnanakaw. Nakulong..
pag-labas niya galing sa kulungan- naghanap siya kaagad ng mapapasukan trabaho.. maraming nagdamot ngunit may nagbigay din ng pagkakataon na siya ay makapag simula muli sa kanyang bagong buhay. Sa kabila ng pasakit na kanyang naranasan ipinakita niya ang kanyang katatagan huwag na muling bumalik sa dating buhay.
7. Pagtanggap- Natutunan ko ito sa mga taong nagbigay ng pagkakataong magsimula muli ang isang dating prostitute at pusher ng ipinagbabawal na gamot. Sa kabila ng kanilang nakaraan tinanggap nila sila at binigyan ng bagong buhay at pag-asa.
8. Pagpapasalamat- tinuro nila sa akin lahat ito, sa kabila na sila ay nahihiya dahil sa estado nila sa buhay at itsura madalas silang magpa salamat kahit na maliit lang ang iyong naibigay sa kanila.
Isang matandang babae na may dalawang anak, nasunog ang kanilang bahay na tinutuluyan. Binigyan namin siya ng konting damit at konting makakain, umiiyak siyang nagpasalamat sa kabutihang loob na binigay sa kanya..hanggang sa umuwi kami ay iyon lang ang nasasabi niya.
9. Pag-alala- Marami sa kanila ang hindi malimutan ang kanilang mga nakaraan, pangit man o maganda. Eto rin naman ang nagiging dahilan para damayan din nila ang kapwa nila lalo na ang mga taong dumadaan din sa kanilang pinagdaanan. Marami sa kanila ang hindi makakalimot sa kabutihang iyong ibinigay… habang sila ay nabubuhay ito ay palagi nilang tatandaan at minsan sa abot ng kanilang makakaya ay susuklian nila ito ng isang kabutihan din.
10. Magbigay Buhay- Alam nila kung kailan makikinig, magpapayo at magsasalita. Tinuruan nila akong kung paano bigyan ng halaga ang buhay..lalo na ang buhay ng aking kapwa.
May isang babae na minaltrato ng kanyang asawa, nilapitan siya ng akin kasama at sila ay nag-usap. Nagpalitan sila ng kanilang mga mapapait na nakaraan.. umiyak ang dalawa.
” dumaan din ako sa ganyang problema kaya kailangan kong tulungan kung sino man ang nangangailangan.Malaki rin ang naitulong sa akin ng pakikinig sa kanyang problema. Hindi pala ako nag-iisa. Dati binabalingan ko ng sisi ang aking sarili ngunit ng marinig ko ang problema ng iba..may mas matindi pa pala sa aking nararanasan.” wika ng aking kasama ng siya ay aking kausapin.
11. Pagiging Masayahin- sa kabila ng lahat, ng hirap na kanilang nararanasan nakukuhang pa nilang makipagtawanan at makipagbiruan. Minsan ay napapasaya nila ako.
may isang nagwika sa kanila: “mahirap talaga ang buhay, pero sino ba naman ang may gustong magmukmok sa sulok at umiyak ng nag-iisa, mas maganda na siguro ang makihalubilo ka sa iyong mga kabarkada at makipagtawanan.”
12. ang mga salitang ito ang hindi ko makakalimutan.. “ang magmahal sa kabila ng lahat”. Dukha man ang paningin sa kanila ngunit napaka ginto naman ng kanilang mga puso dahil sa kanilang pinapakitang pagmamahal.
Sa kabila ng lahat na ikaw ay may pangit na nakaraan, matigas ang ulo at pasaway ikaw ay Kanyang mamahalin.
Sa kabila ng lahat na ikaw ay dating bilango, prostitute, dating sugapa sa droga ikaw ay Kanyang mamahalin.
Mamahalin ka Niya hindi dahil sa kung ano meron ka at kung ano ang maibibigay mo, kungdi mamahalin ka Niya sa kabila ng lahat..
Huwag po nating kalimutang tumulong sa PENS OF HOPE ni nortehanon. Sa inyong konting tulong ay maraming mapapasayang mga bata.
salamat 
P.s.
Hapi 1st yr. anniversary sa blog ni bro. utoy!
Eighty-Eight butterfly(Diaethria neglecta), mula sa bansang Brazil, dahil sa tuldok at linya sa kanyang pakpak kung bakit siya may ganitong pangalan. (photos are from National Geographics photo archives/Joel Sartore).
