Ano ang Silbi?

April 16, 2010

Isa pong paalala para sa mga nais maglingkod sa ating bayan:

Ano ang silbi ng kapangyarihan
kung ito’y gagamitin lang sa mga maliliit, mahihina at walang kalaban-laban.
Ang kapangyarihan ay regalo mula sa Itaas,
hindi para gamitin sa mga mahihina at walang kalaban-laban,
kundi para magsilbi sa mga ito ng walang hinihintay na anumang kapalit.

Ano ang silbi ng karunungan,
kung ito’y gagamitin para manloko ng ating kapwa.
Ang karunungan ay regalo mula sa Itaas,
hindi para manloko ng ating kapwa,
kundi para turuan at gabayan sila.

Ano ang silbi ng pagiging mayaman,
kung lalo pang pahihirapan ang mga mga dukha.
Ang kayamanan ay regalo mula sa Itaas,
hindi para itambak sa baul at magpahirap ng kanyang kapwa
kundi para ibahagi sa mga dukha, maysakit, walang tirahan at nangangailangan.

Ang Kapangyarihan, Karunungan at Kayamanan ay regalo mula sa Panginoon,
kaya dapat lang na ingatan at gamitin sa tamang paraan.

By sandi | Posted in Karapatan ng Bawat Nilikha | Tagged , , , , , , , , , , , , , , , , , , , | Comments (16)

aTY 1st Anniversary

December 29, 2009

Happy  1st Anniversary ang Tanging Yaman!

namamasko po!

namamasko po!

Magandang araw po sa inyong lahat! Masayang masaya ako sa araw na ito, dahil ito ang unang araw na isinilang “ang tanging yaman”. Lubos ang aking pasasalamat kay Big Bro. na isinilang niya ito para makapag bigay ng liwanag at inspirasyon sa mga taong naglalakbay sa madilim na daan ng buhay, makatulong ng simple at maipadama ang Kanyang presensya sa mga taong may kakaibang sakit at sa mga taong nakakaramdam na sila ay nag-iisa sa kanilang pinadaraanan sa buhay.

Sa kabila ng napakarami kong pagkukulang, sa aking pagtalikod sa Kanyang tawag noon ay hindi Siya nagsasawang ako ay gabayan at kalingain. Kaya naman lubos ang aking pasasalamat kay Big Bro. at kay Ina’y Maria. Nagpapasalamat rin ako na binigyan ako ng pagkakataon na kahit dito at sa pamamagitan ng pagtulong ko sa aking kapwa ay mapaglingkuran ko Siya. Salamat at kahit papaano ay nakapag sponsor ako ngayong taon ng tatlong simpleng soup kitchen at makapagbigay ng konti sa mga taong nasa “hands of friendship”.  Kulang pa siguro ang aking ginawa kumpara sa pangangailangan ng aking kapwa at sa kabutihang pinapakita ni Big Bro. sa akin.

At syempre, Sa inyong lahat na aking mambabasa na naging mga kaibigan, maraming maraming salamat po sa inyong pagsuporta at walang sawang pagsubay-subay sa “ang Tanging Yaman”. Sa iba’t ibang blogger at blogsite na nagbigay ng pagkilala at parangal sa akin at sa aTY…maraming salamat po! Ang pinaka magandang regalong aking natanggap ay nadagdagan ang aking mga kaibigan.

Marami pa akong pangarap sa aty, gusto ko pang lumawak ang sakop nito at naaabot pero hindi sapat at limitado lang ang aking pondo kaya ipahintulot nyo po sanang makapaglagay ako ng donations button para sa page na “Hands of Friendship para mas marami pang matulungan at ang matitira ay para sa maintenance ng aty. Sa tuwing aking nakikita at nababalitaang nadagdagan ang mga may sakit, walang makain, walang matitirhan, mga taong naghahanap ng pang-unawa sa kanilang pinagdaraanan. Kailangan kong kumilos at sila ay abutin at tulungan para maiwasang sila at kanilang mahal sa buhay ay tuluyang lumayo at malimutan na mayroong Diyos na nakikinig sa kanilang panalangin at hinaing.

Anuman tulong ay labis naming ikatutuwa at bahala na po si Big Bro na gumanti sa inyong kagandahang loob.

Ipagpaumanhin nyo kung minsanan lang ako makadalaw sa inyong blog, hindi makareply sa inyong comment. Sa ngayon ang inyong lingkod ay dumadaan sa isang krisis at kailangan magtipid…sarling sikap ang trabaho ko ngayon..minsan meron,minsan wala. Umaasa lamang sa Kanyang dakilang awa at grasya. Salamat na lang andyan Siya palagi ang aking Tanging Yaman para ibigay ang aming pang araw-araw na pangangailangan.

God bless us all more this coming year 2010!

In prayer with Mary,

sandi

signature sandi
By sandi martin | Posted in Inspirasyon, Kalikasan at Kapaligiran, Karapatan ng Bawat Nilikha | Tagged , , , , , , , , , , , , , , , , , , , , , , | Comments (12)

Ang Tunay na Katanyagan

November 12, 2009

Sa tatlong taong magkasunod, tumanggap nanaman si Noel ng parangal bilang best broadcast news anchor. Empleyado ng ABMA broadcasting company sa loob ng labinglimang taon, nag-umpisa at nagsumikap sa kanyang trabaho bilang isang reporter, mula sa mga mahihirap na assignments hanggang sa maabot niya ang kanyang estado ngayon, isang kilalang news anchor. Saan man siya magpunta, hindi pwedeng walang makakakilala sa kanya at walang babati dahil sa kanyang natatangap na parangal.

Pinipilit ni Noel na huwag ipasok sa kanyang ulo ang kasikatang kanyang tinatamasa ngayon, pero minsan mahirap gawin. Halos lahat ng kanyang mga kasama sa trabaho ay nagsusumikap para makamit ang kasikatan at pagkilala sa kanilang propesyon, at hindi sila nagdadalawang-isip na maka-apak ng iba para ma-una lang. Kahit na si Noel ay biktima ng mga ganitong pangyayari, ang minsan ay ikaw ay apakan at tirahin kapag ikaw ay naka-talikod ng mga taong itinuring mong kaibigan. Araw-araw palagi siyang nanalangin at humihingi ng tulong na siya ay turuang manatiling maging mapagkumbaba.

Ginawa ni Noel na maging iba ang kanyang pananaw sa buhay sa paglilingkod sa mga batang maysakit sa ospital ng kanilang lugar. Ang kanyang naramdaman at nakikita sa mga batang maysakit na nakakaranas ng paghihirap at dagok sa kanilang buhay, ang nagsisilbing kanyang gabay para makita ang lahat ng bagay. Ang katapangan at pag-asang pinakikita ng mga bata ay nagsisilbing inpirasyon sa kanya, at minsan naiisip niyang humingi ng kanilang mga autograph.

Isang hapon, habang siya ay pumapasok sa kuwarto ng mga bata, may isang bagong pasyente ang nagwika sa kanya, “di ba sikat ka”?

“Hmmm..hindi naman!” wika ni Noel.

“Alam ko sikat ka,” ang pilit ng batang lalaki. “Maraming nagkukwento sa akin dito na ikaw ay magaling sa larong chess. Pwede bang maka-laro kita?”

“Sige, sige laro tayo!” wika ni Noel. Habang humihila ng dalawang silya at lamesa, winika niya sa kanyang isipan, maraming salamat po Panginoon, sa pagtuturo mo sa akin kung ano ang mahalaga at makapagpapa-saya sa iyong kalooban.

signature sandi
By sandi martin | Posted in Maikling Kwento sa Tanging Yaman | Tagged , , , , , , , , , , , , | Comments (30)

Sino ang Iyong Inspirasyon?

November 5, 2009

“Brothers and sisters, none of us lives for oneself, and no one dies for oneself. For if we live, we live for the Lord, and we if we die, we die for the Lord. So then, whether we live or die we are for the Lord.” -Romans 14

May mga taong nagbibigay inspirasyon sa napakaraming tao sa pamamagitan ng kanilang mga gawa. Tayo ay pwedeng humanga sa mga leader, athletes, scientist, geniuses, authors, actor and actress, artists.
Sinuman taong sinusubukang lagpasan ang kakayahan ng kanyang sarili ay nakakapukaw sa ating pansin at mapa-isip. Pinaparamdam sa atin na ang limitasyong binibigay natin sa ating mga sarili ay maari din nating malagpasan.

I admire people from all walks of life, Ang pagka-kawanggawa ni Mother Teresa na maraming hinipong mga tao, ang kadakilaan ni St. Francis of Assisi, ang mga relihiyosong nagbuwis ng kanilang mga buhay para ikalat ang Kristyanismo sa buong mundo. Ang mga taong iniisip muna ang kapakanan ng iba kaysa sa kanyang sarili, tulad na lang ng mga taong sinuong ang panganib, naglaan ng panahon at oras nitong mga nakaraang kalamidad para lang makapag salba ng buhay, makapagdala ng gamot at pagkain. Ang mga taong ipinaglalaban ang pagpapahalaga sa buhay, kalayaan at karapatan ng bawat nilikha, si Nelson Mandela, sina Mahatma at Indira Gandhi, sina Ninoy at Cory Aquino at ang ating mga bayani.

Ang aking pinaka-mamahal na nanay at tatay ay nagsisilbing inspirasyon sa akin. Ang kanilang kasipagan, katapangan at walang hanggang pang-unawa ang siyang nagbibigay sa akin na magtiwala sa aking sarili at kakayahan. Ako rin ay humahanga sa ibat-ibang tao, sa aking mga kaibigan, kapwa blogger na sa pamamagitan ng kanilang pagsusulat at iba’t ibang sariling paraan ay unti-unting tinataas ang antas ng pagpapahalaga at pag-kalinga sa lahat ng buhay na binigay ng Diyos.

Sino ang nagbibigay inspirasyon sa iyong buhay? Nawa’y ang mga hinahangaan natin ay hindi lang magsilbing ating idolong tinitingala kungdi magsilbing paalala sa ating kakayahan. Hindi nating kailangan gumawa ng extra ordinaryo para makapa mamuhay ng extra ordinaryo, hindi natin kailangan ang iba’t ibang pananaw ng mundo sa lahat ng ating ginagawa para ito ay maging mahalaga. Ang ating pagpapahalaga sa paglago at pagbabago bilang indibidwal ang siyang importante.

Sino ang iyong inspirasyon?

Para sa mga hindi pa nakikita ang videong ito: you are the light

signature sandi
By sandi martin | Posted in Inspirasyon, Kalikasan at Kapaligiran, Karapatan ng Bawat Nilikha | Tagged , , , , , , , , , , , , , | Comments (14)

Panalangin

July 27, 2009

May isang istorya sa isang abalang kalsada, may isang matandang babaeng walang tirahan ang nakatayo sa gilid nito habang ang malakas na ulan ay unti-unti bumubuhos.

Ang mga taong  naglalakad sa kalsada at nagtatrabaho sa kalapit na mga opisina ay dali-daling sumisilong sa mga gusali at restwaran. Ang mga taong may magagarang payong, mga may dala-dalang shopping bags at magagandang briefcase ay dinaraanan lang ang matandang babae na para bang hindi napapansin.

“Lord, sana po ay may makapansin sa akin” wika ng matandang babae. Ang babae ay nagdarasal habang siya ay unti-unting nababasa ng malakas na ulan. “Ito lang po ang aking hiling sa inyo..ang may makapansin sa akin”. Pumasok sa kanyang isip kung ang panalangin ng isang dukhang katulad niya ay pinakikingan ng Diyos. “Lord, nariyan ka ba?” “Nawala na sa akin ang lahat, pati ba naman Ikaw?” “Kailangan kasi kita sa aking buhay.”

Habang ang matandang babae ay naghihintay ng tutulong sa kanya, mayroon isang babaeng nagmamaneho ng kanyang auto ang napadaan sa kalsada. Katulad ng kanyang naka-ugalian siya ay palaging nanalangin sa ating Diyos, “Lord, sana po ay maging instrumento mo ako ngayong araw na ito.” Sa bintana ng kanyang sasakyan, nakita niya ang matandang babaeng nakatayo sa isang sulok, basang-basa at giniginaw. Ng walang pasubali, pinarada ng babae ang kanyang auto sa gilid ng kalsada at tumakbo patungo sa matanda. Dahan-dahan niyang inabot ang kamay ng di-kilalang babae at tinanong. “Paano ko po kayo matutulungan”. tanong ng babae.

Ang mata ng matandang babae ay napuno ng luha ng kagalakan. “Pinakinggan mo ang aking panalangin sa Iyo.” wika niya.

Minsan, pumapasok sa ating isipan ang magtanong kung pinakikingan nga ba ng ating Diyos ang ating panalangin sa Kanya. Katulad ng matandang babae sa kuwento, isang taong walang tirahan, kulang ang kaalaman sa ating Diyos, naghihintay lagi ng tulong sa mga taong laging nakahandang tumulong at ipakita ang mukha ng Panginoon sa kanila.

Ayon sa mga relihiyoso at eksperto ang “panalangin” ay pakikipag-usap natin sa ating Panginoon, ito ay nagbibigay sa ating ng pag-asa habang pina-aabot natin sa langit ang ating mga minimithi. Ang panalangin ay nagsisilbing payong ng kapayapaan at habang tayo ay nakasukob sa ating Panginoon, tayo ay Kanyang pinagmamasdan at kinakausap, “Kaibigan, ikaw ay mahalaga sa Akin at mahal na mahal kita.”

Sa panalangin, ang ating Diyos ay pinakikingan tayo ng pantay-pantay. Pinahahalagahan Niya ang hinaing ng bawat taong nagsasabing “kailangan po kita Lord.” Hindi natin kailangan ng perpektong pagdarasal para ito ay Kanyang pakinggan. Walang pormula para ang ating panalangin ay siguradong Kanyang tugunin.  Sundan natin ang ginawa ng matandang babae sa istorya, ang aminin na kailangan natin Siya sa ating buhay, hangad natin ang Kanyang presensiya, at naghihintay lagi ng Kanyang pag-tugon.

Ang panalangin ay ang susi para sa isang masaganang buhay espiritwal. Ito ay magbibigay sa ating ng kapanatagan at kasiyahan ng kalooban anuman ang mangyari sa ating minimithi dahil ang ating Panginoon ay ang ating Tanging Yaman.

By sandi martin | Posted in Buhay Espiritwal, Maikling Kwento sa Tanging Yaman | Tagged , , , , , , , , , , , , , , , , | Comments (11)

Ang Tanging Yaman

July 23, 2009

Dalawang dekada ang lumipas, Pumasok sa aking isipan ang salitang “Tanging Yaman” ng ako ay isang aktibong choir member pa lamang sa aming simbahan. Isang kantang sinulat ni Fr. Manoling Francisco,heswita. Nagbigay  inspirasyon sa akin ang kantang ito, para sa aking araw-araw na pakikipagsapalaran sa mundong aking ginagalawan. Ang mga salitang ito ay nagsilbing paalala sa akin na huwag akong maghangad ng labis, ang huwag maiingit. Umasa lagi at magtiwala sa Kanyang kalooban at pagpapala, dahil Siya ang mas nakakahigit, sa Kanya lahat nagmumula ang lahat dahil Siya ang ating Panginoon, ang ating Tanging Yaman.

Matagal ko na rin pinangarap na makapagtayo ng isang sariling negosyo na ang pangalan ay “Tanging yaman” bilang pasasalamat sa lahat ng biyayang Kanyang binibigay. Dumaan ang maraming taon wala akong negosyong napundar dahil walang sapat na kapital. Ngunit may iba palang plano ang ating Diyos, ang plano pala Niya ay magbigay ako ng inspirasyon sa mga kagaya kong minsan ay hinahanap Siya, sa mga taong nabibigatan sa kanilang dalahin, sa mga nag-iisa, sa mga taong maysakit at walang sapat na pampapagamot at sa mga taong nagugutom.

Labis akong natutuwa na nagamit ko ang salitang “Tanging Yaman” para Siya ay aking parangalan at magbigay ng inspirasyon sa inyo at sa ibang tao. Ito ay isang katuparan ng aking mga pangarap. Nawa’y ang pagpapala ng ating Panginoon ay palagi nating madama.

God bless us all!

By sandi martin | Posted in Buhay Espiritwal | Tagged , , , , , , , , , , , , , , , , , , , , , , , , | Comments (67)

Sa Ating Paglago

July 17, 2009

“Lumago kang kilala Siya at malapit sa ating Diyos dahil Siya ang ating Tanging Yaman.”

rainnyMay isang istorya ng isang “acorn nut” na nahulog sa loob ng isang lata at natabunan ng lupa. Dumaang ang mga araw, isang maliit na talbos  ang sumibol at tumulak papalabas ng lupa. Ang bagong sibol na talbos ay kumuha ng tamang-tama sustansiya para siya ay lumago at mabuhay. Maraming taon ang dumaan, ang maliit na  acorn na binalewala ang tigas ng lata ay naging isang malaking puno kung tawagin ay “oak tree”.

Araw-araw tayo ay nabibigyan ng hindi mabilang na pagkakataon para samantalahin na mag-simula muli. Ang bagong simula ay dumarating kapag may natapos na ibang pangyayari sa ating buhay. Kapag hinayaan natin ang ating mga kasalanan ay mawala sa ating mga puso, tayo ay nagkakaroon ng panibagong buhay kasama ang ating Panginoon. Tayo ay lumalago katulad ng isang mataas at matibay na puno, na nagsimula sa isang maliit na binhi.

Katulad ng isang maliit na binhi, tayo ay unti-unting lumalago ng hindi growing on you 5nating namamalayan. Tayo ay nabubuhay dahil sa Kanyang dakilang pagmamahal at pagkalinga sa ating lahat. Hindi Niya pinangako na palaging bughaw ang kalangitan at hindi rin Niya pinangako na palaging sisikat ang araw, bagkus Kanyang pinangako na tayo ay Kanyang palaging sasamahan at kakalingain sa oras ng kadiliman at unos na sasapit sa ating buhay.

“Minsan ang akala nating katapusan, ay siya palang umpisa pa lamang ng isang bagong simula.”- anonymous

By sandi | Posted in Buhay Espiritwal, Maikling Kwento sa Tanging Yaman | Tagged , , , , , , , , , , , , , , , , , , , , , , , , , , , , , | Comments (30)

Ituon ang Iyong Isip

July 14, 2009

May isang istorya tungkol sa isang panang lumilipad patungo sa inasintang lugar ng kanyang amo. Maya-maya ang panang matuling gumagalaw ay biglang tumigil sa kalagitnaan ng kanyang paglipad para tignan kung gaano na kalayo ang kanyang narating, kung gaano kataas ang kanyang nililipad, kung gaano siya kabilis kumpara sa ibang pana at kung gaano siya kagandang lumipad. Ng ibalik na ng pana ang kanyang pokus sa lugar na inasinta, siya ay bumagsak sa lupa.

Ang malabis na pag-tuon natin sa ating sarili ay hindi makabubuti para marating natin ang hinahangad na layunin. Ito ay nagsisilbing kabaligtaran ng kababaang-loob, at pagkilos na kasama ang ating Panginoon.

Ilang beses na ba nating kinumpara ang ating sarili sa iba at sukatin ang ating tagumpay at pag-bagsak ayon sa buhay ng iba? Ang ganitong gawain ay hindi gusto ng ating Panginoon. Ang Kanyang dahilan kung bakit ayaw Niyang ikumpara natin ang ating sarili sa iba ay dahil ang Kanyang mga plano sa ating buhay ay iba-iba. Kung may gusto tayong alamin tungkol sa ating buhay, marapat lamang na Siya ay ating lapitan at kausapin.

Kung ating susuriin ang ating mga sarili, kailangan natin tignan ang ating mga puso, siguruhin natin na tayo ay naglalakad ng may pagtitiwala at pagkadalisay patungo sa Kanya.

Hinihikiyat Niya rin tayong gamitin ang lahat ng ating mga talento, regalo at narating sa buhay para sa Kanyang ikararangal. Dahil sa panahon natin ngayon, sa ating kasalukuyang sistema ng buhay, marami sa ating ang nabubuhay bilang profitsyunal imbes na proffesional.

Ang gantimpala ng isang ganap na Kristiyanong buhay kapag inalay natin ang ating buhay sa ating Panginoon at ibang tao, tayo ay makatatangap ng isang masasabi nating totoong kaligayahan at katuparan. Habang hinahawakan naman natin ang ating sariling buhay at nagiging maka-sarili tayo sa ating hangarin at kagustuhan, tayo ay nagiging kahabag-habag.

Sinusuri man nating ang ating mga puso o ginagamit ang talento at regalo na bigay ng ating Diyos. Marapat lamang na lagi nating ituon ang ating isip at puso sa Kanya. Tanungin natin Siya kung ano ang Kanyang plano sa ating buhay dahil Siya ang ating Tanging Yaman.

By sandi | Posted in Buhay Espiritwal, Maikling Kwento sa Tanging Yaman | Tagged , , , , , , , , , , , , , , | Comments (20)